O cateterismo cardíaco, tamén chamado coronariografía, é a técnica invasiva máis frecuentemente realizada en cardioloxía. Efectúase inxectando un contraste nas arterias do corazón para, posteriormente, ver as imaxes en movemento cun equipo de raios X. As arterias do corazón (arterias coronarias), cando están cheas de contraste, visualízanse como as ramas dunha árbore no outono.
O cateterismo utilízase fundamentalmente para detectar e tratar posibles estreitezas (estenose) nas arterias do corazón.
É a proba definitiva e máis fiable para demostrar esas estreitezas nas arterias do corazón en pacientes que presentan dor no peito. Emprégase igualmente en pacientes que van ser sometidos a cirurxía das válvulas do corazón, para ver se tamén presentan estas estreitezas, e poder aproveitar a intervención cirúrxica para actuar sobre elas.
Que podo sentir?
É unha técnica invasiva e, por tanto, ten algúns riscos, aínda que case sempre mínimos. Pode sentir molestias na zona de punción da arteria; e, en ocasións, a mobilización dos catéteres pode resultar dolorosa. Ao inxectar o contraste pode sentir calor, sensación que adoita ser pasaxeira.
Entre as complicacións máis infrecuentes figurarían os hematomas ou sangrados na zona de punción ou mesmo arritmias graves. En todo momento o persoal saberá como atendelas. O risco vital existe, pero é menor dun cada mil pacientes, e adoita depender do grave da situación do enfermo. Durante a realización desta proba, dado que a anestesia é local, estará sempre en contacto cos cardiólogos e o persoal de enfermería, polo que poderá transmitir todo o que sente.
Para máis información